លោកអភិបាលស្រុកប្រាសាទបាគង បានបន្តដឹកនាំក្រុមការងារ​ជួបប្រជុំជាមួយអាជ្ញាធរឃុំ ភូមិ និងបងប្អូនប្រជាពលរដ្ឋក្នុងសហគមន៍ នៃឃុំមានជ័យ ដើម្បីពិនិត្យមើល​ តំបន់មានសក្កដានុពល​សម្រាប់វិស័យទេសចរណ៍​របស់ឃុំ​

ខេត្តសៀមរាប៖ លោក សូរ ប្លាតុង អភិបាលស្រុកប្រាសាទបាគង បានបន្តដឹកនាំក្រុមការងារ​ជួបប្រជុំជាមួយអាជ្ញាធរឃុំ ភូមិ និងបងប្អូនប្រជាពលរដ្ឋក្នុងសហគមន៍ នៃឃុំមានជ័យ នាថ្ងៃទី០២ ខែមិថុនា ឆ្នាំ២០២០នេះ ដើម្បីពិនិត្យមើល​ តំបន់មានសក្កដានុពល​សម្រាប់វិស័យទេសចរណ៍​របស់ឃុំ​ និង​ ផ្សព្វផ្សាយពីគម្រោង​ វិថីប្រពៃណីខ្មែរ(Road of Khmer Tradition) សម្រាប់ស្រុកប្រាសាទបាគង ។

លោកបានអោយដឹងថា ក្រុមការងារ​ នឹងបន្តចុះពិនិត្យ​ហើយ​ ធ្វើការសម្រង់​ទីតាំង​ មានសក្កដានុពលសម្រាប់វិស័យទេសចរណ៍ទាំងអស់ នៃបណ្តារឃុំទាំង៩ក្នុងស្រុកប្រាសាទបាគង បន្ទាប់មកយើងនឹងកសាងផែនទី ​រួមជាមួយអត្ថបទ បង្ហាញអំពីប្រវត្តិ​ និងទិដ្ឋភាពទីតាំងទាំងនោះ រួចហើយនាំយកទៅធ្វើបទបង្ហាញ​ ជូនបណ្តារភ្នាក់ងារទេសចរណ៍​ មន្ទី​ទេសចរណ៍​ និងថ្នាក់ដឹកនាំខេត្តសៀមរាប ក៏ដូចជាអាជ្ញាធរជាតិអប្សរា ដើម្បីស្នើរសុំការគាំទ្រ ហើយជួយជំរុញការផ្សព្វផ្សាយបន្ថែម។

លោកអភិបាលស្រុកលើកឡើងទៀតថា គោលបំណង នៃ​គម្រោង​ វិថីប្រពៃណីខ្មែរ​(Road of Khmer Tradition) ក្នុងស្រុកប្រាសាទបាគង​ គឺដើម្បី រួមចំណែកទាញចំណាប់អារម្មណ៍ ភ្ញៀវទេសចរ​ណ៍​ អោយពន្យាពេល​ស្នាក់នៅ​ ក្នុងសហគមន៍យើង បង្កើតឪកាសសម្រាប់រកចំណូលបន្ថែម ដោយរក្សាបាននូវ វប្បធម៍ប្រពៃណីជាតិយើង។

គម្រោងនេះ ក៏ត្រូវការ ការចូលរួមពីបងប្អូនប្រជាពលរដ្ឋជាចាំបាច់​ ដូចជាសកម្មភាព ថែរក្សាបរិស្ថាន សោភណ្ឌ័ភាព និងស្នាមញញឹមក្នុងមូលដ្ឋាន ហើយគម្រោងនេះ ក៏នឹងផ្តល់ឪកាស ជូនបងប្អូនប្រជាពលរដ្ឋវិញ នូវការងារ និងមុខរបរ​ បន្ថែមផងដែរ៕