(ភ្នំពេញ): បុរសជនជាតិចិនម្នាក់ បានបើករថយន្ត ជ្រុលចង្កូត ទៅបុករបាំងថ្ម ពុះចែកទ្រូងផ្លូវ ហើយបានបន្តទៅបុកម៉ូតូ មួយគ្រឿងទៀត ក្នុងទិសដៅបញ្ច្រាសទិសគ្នា ពេញទំហឹង បណ្ដាលឲ្យស្ត្រី ពីរនាក់ រងរបួសធ្ងន់ ចំណែកអ្នកបើកបររថយន្ត ត្រូវបានសមត្ថកិច្ចឃាត់ខ្លួន។
ហេតុការណ៍នេះ បានកើតឡើង កាលពីវេលាម៉ោង ២១៖៤០ននាទីថ្ងៃទី០១ ខែមិថុនា ឆ្នាំ ២០២២ នៅចំណុចមុខសាលាខណ្ឌពោធិ៍សែនជ័យ តាមបណ្តោយផ្លូវហព័ន្ធរុស្ស៊ី ស្ថិតក្នុងសង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានពីកន្លែងកើតហេតុ បានឲ្យដឹងថាៈ មុនពេលកើតហេតុ គេឃើញបុរស ជនជាតិចិនម្នាក់ បើករថយន្តម៉ាក Honda CRV ពណ៌ទឹកប្រាក់ ពាក់ស្លាកលេខ ភ្នំពេញ 2S-4029 ធ្វើដំណើរក្នុងទិសដៅពីខាងកើត ទៅលិច ក្នុងស្ថានភាពស្រវឹង។ លុះមកដល់ចំណុចកើតហេតុ ខាងលើ រថយន្តនេះ បានរេចង្កូតទៅខាងឆ្វេងដៃ ជ្រុលទៅបុករបាំងថ្ម ពុះចែកទ្រូងផ្លូវ បណ្ដាលឲ្យបាក់អស់មួយកង់ ចំណែករថយន្តបង្ក បានបន្តទៅបុកម៉ូតូ ហុងដា ស្កូបពី មួយគ្រឿងទៀត ពណ៌ស ពាក់ស្លាកលេខ ភ្នំពេញ 1IX 6459 ជិះដោយស្ត្រីពីរនាក់ ធ្វើដំណើរ បញ្ច្រាសទិសដៅគ្នា ពីខាងលិច ទៅកើត ចំពីមុខពេញទំហឹង បណ្ដាលឲ្យដួលបោក ទៅនឹងថ្នល់ រងរបួសធ្ងន់។
ភ្លាមនោះ រថយន្តសង្គ្រោះបន្ទាន់ បានមកដដឹកស្ត្រីដែលរងគ្រោះ ទៅសង្គ្រោះនៅឯមន្ទីរពេទ្យ ។ ចំណែអ្នកបើកបររថយន្តបង្ករគ្រោះថ្នាក់ខាងលើ ត្រូវបានសមត្ថកិច្ចឃាត់ខ្លួន នាំយកទៅ អធិការដ្ឋានខណ្ឌពោធិ៍សែនជ័យ ជាបណ្ដោះអាសន្ន រង់ចាំប្រគល់ជូនជំនាញ អនុវត្តបន្ត តាមនីតិវិធី។
ក្រោយកើតហេតុ សមត្ថកិច្ចមូលដ្ឋាន បានទំនាក់ទំនងទៅសមត្ថកិច្ចជំនាញ ចុះមកវាស់វែង យករថយន្ត និង ម៉ូតូ រួមទាំងអ្នកបើកបររថយន្ត យកទៅការិយាល័យចរាចរណ៍ផ្លូវគោក នៃស្នងការដ្ឋាននគរបាល រាជធានីភ្នំពេញ រង់ចាំដោះស្រាយគ្នា តាមផ្លូវច្បាប់៕
No comments:
Post a Comment