អគ្គិភ័យឆាបឆេះផ្សារបឹងឈូក ជាន់ខាងលើផ្អើលប្រជាពលរដ្ឋនិងសមត្ថកិច្ចចេញអន្តរាគមន៍ពន្លត់ទាំងយប់

ខេត្តបាត់ដំបង ៖ អគ្គិភ័យបានឆាបឆេះលេបត្របាក់ផ្សារបឹងឈូកជាន់ទី០២ស្ទើទាំងស្រុង បង្កការភ្ញាក់ផ្អើលដល់ប្រជាពលរដ្ឋ ក៏ដូចជាសមត្ថកិច្ចជំនាញចេញអន្តរាគមន៍ពន្លត់នៅវេលាម៉ោង ២២ និង៣០នាទីយប់ ពីថ្ងៃទី០៣ ខែវិច្ឆិកា ឆ្នាំ២០២៤ ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង។

ក្នុងហេតុការណ៍គ្រោះអគ្គិភ័យខាងលើនេះដែរ សមត្ថកិច្ចជំនាញបានចេញរថយន្តពន្លត់អគ្គីភ័យជាច្រើនគ្រឿងក្នុងការចុះអន្តរាគមន៍ពន្លត់ដោយប្រើប្រាស់អស់ទឹកជិត ១០០ឡាន រហូតដល់វេលាម៉ោង០៣ ទៀបភ្លឺ ឈានចូលថ្ងៃទី០៤ ខែវិច្ឆិកា ឆ្នាំ២០២៤ ទើបគ្រប់គ្រងអណ្តាតភ្លើងបានស្ទើទាំងស្រុង។

ជុំវិញគ្រោះអគ្គិភ័យនេះដែរ សមត្ថកិច្ចនៅមិនទាន់បញ្ជាក់បានអំពីមូលហេតុនៃការឆេះនិងទំហំនៃការខូចខាតនៅឡើយទេ ប៉ុន្តែបើតាមប្រភពពីអាជីវករ តូបលក់ដូរ ក្រណាត់ ខោអាវ ហូលផាមួង រាប់សិបតូបត្រូវបានឆេះអស់ស្ទើទាំងស្រុង៕