អាជ្ញាធរខេត្តកំពង់ឆ្នាំង ចុះចែកអាវពោងសុវត្ថិភាពចំនួន១៥១អាវ ដល់សិស្សានុសិស្ស នៅសាលាបឋមសិក្សា ចំនួន ០៧ ក្នុងស្រុកកំពង់លែង

កំពង់ឆ្នាំង៖ នៅព្រឹកថ្ងៃពុធ ទី១៤ ខែតុលា ឆ្នាំ២០២០នេះ ឯកឧត្តម សៀត គឹមលៀង អនុប្រធានគណៈកម្មាធិការសាខា រួមដំណើរដោយឯកឧត្តម កែវ ពៅ អនុប្រធានកិត្តិយសសាខា នាយក នាយិការង ប្រតិបត្តិសាខា គណៈកម្មាធិការអនុសាខាកាកបាទក្រហមកម្ពុជាស្រុកកំពង់លែង បានអញ្ជើញក្នុងពិធី ប្រគល់ អាវពោងសុវត្ថិភាព ចំនួន ១៥១អាវ ដល់សិស្សានុសិស្ស នៅសាលាបឋមសិក្សាចំនួន ០៧ ក្នុងស្រុកកំពង់លែង ខេត្តកំពង់ឆ្នាំង។

សូមបញ្ជាក់ជូនផងដែរៈ អាវពោងសុវត្ថិភាព ចំនួន ១៥១អាវ ត្រូវបានចែកជូនដល់សិស្សានុសិស្ស នៅសាលាបឋមសិក្សា ចំនួន ០៧ មានៈ សាលាបឋមសិក្សាប្រឡាយមាស សាលាបឋមសិក្សាផ្លូវទូក សាលាបឋមសិក្សាស្លត សាលាបឋមសិក្សាពាមខ្នង សាលាបឋមសិក្សាថ្នល់ឈើទាល សាលាបឋមសិក្សាអន្លុងកញ្ចុះ និងសាលាបឋមសិក្សាកោះឬស្សី ស្ថិតក្នុងស្រុកកំពង់លែង ខេត្តកំពង់ឆ្នាំង។

ថ្លែងក្នុងឱកាសនោះ ឯកឧត្តម សៀត គឹមលៀង អនុប្រធានគណៈកម្មាធិការសាខា បានពាំនាំប្រសាសន៍ផ្ដាំផ្ញើសួរសុខទុក្ខពីសំនាក់សម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ឯកឧត្តម ឈួរ ច័ន្ទឌឿន ប្រធានកិត្តិយសសាខា ឯកឧត្តម អម សុភា ប្រធានគណៈកម្មាធិកាសាខា ដែលតែងយកចិត្តទុក្ខដាក់ពីសុខសុវត្ថិភាពដលប្រជាពលរដ្ឋគ្រប់ៗរូប។ 

ជាមួយគ្នានេះ ឯកឧត្តម អនុប្រធានគណៈកម្មាធិការសាខា បានណែនាំ ក៏ដូចជាផ្ដាំផ្ញើដល់ប្រជាពលរដ្ឋទាំងអស់ នៅពេលមានករណីសត្វអាសិរ្ពិសចឹក ឬខាំ សូមបញ្ជូន អ្នកជំងឺមកព្យាបាលនៅមន្ទីរពេទ្យជាបន្ទាន់ ចៀសវាងការព្យាបាលតាមបែបបុរាណ បន្ថែមលើនេះ លោកនាយកក៏បានអប់រំ ផ្សព្វផ្សាយ ណែនាំអំពីវិធានការការពារ សម្អាតអនាម័យក្នុងការការពារខ្លួនពីការឆ្លងជំងឺផ្សេងៗ ជាពិសេសជំងឺកូវីដ១៩ ជំងឺគ្រុនឈាម និងជំងឺគ្រុនឈិកដែលកំពុងតែរីករាលដាលក្នុងពេលបច្ចុប្បន្នផងដែរ៕